由陳友自資同編寫嘅音樂劇，喺去年上演後得到唔錯嘅迴響，令佢大有滿足感。嚟緊音樂劇將會重演，呢次陳友更邀請咗中聲3嘅 張與辰 同 趙浚承 加盟，分別演出B哥哥鍾鎮濤 同 校長 譚詠麟 ，呢個嶄新組合令觀眾好驚喜，就連陳友都話覺得自己後生咗。
陳友笑言張與辰 同 趙浚承Gary 加盟後，將個年齡層溝淡咗，《中年好聲音》加咗「更年好聲音」，所以影相時都覺得自己後生晒。陳友又指佢嘅家姐讚佢，拍埋兩位後輩時都唔算太顯老，令佢相當感恩。
今次再度飾演陳友夫人嘅黎瑞恩，就話對呢個角色越嚟越熟悉，相信一定會演得更好。而為咗保持良好狀態，小恩子就話養生相當重要，佢指自己有養生buddy，其中一個就係苟芸慧，小恩子仲話佢哋啲養生之旅，苟姑娘好多時都係立即答應出發。而陳友就話好佩服苟姑娘，仲分享一次佢哋外遊時，見到苟姑娘戴住兩個面罩出行，目的只係為咗防曬。
與辰就話要駕馭B哥哥呢個角色一啲都唔易，所以儘管佢好留意對方平時嘅動作同講嘢嘅方式，但都要靠陳友為佢哋調整。而Gary就指演戲對佢嚟講係一種發洩，並指之前喺內地都有演出一啲劇集，Gary坦言鍾意演反派，笑言可以將內心深處嘅陰暗面釋放出嚟。
