馬國明 戲外形象雖然以「天然呆」最出名，不過演戲之外嘅佢其實非常鍾意踢波，細細個就迷上呢項運動。近日馬明為廣告客戶出Post，就公開多張可愛嘅童年照，除咗細個已經鍾意踢波周圍跑，原來天然呆亦係自少養成，非常可愛又趣緻。
馬明寫道：「😎😎😎細個嗰時好鍾意踢波，都有諗過就算唔係全職球員，至少都可以組隊波同朋友keep住鍛鍊下掛？不過平日顧住拍戲、出席唔同活動，有時喺車上面瞓到唔知個人去咗邊。間唔中拍戲期間先被個角色提醒返自己除咗拍戲，仲有其他理想，仲想出去踢陣波，或者學一樣新技能👀👀如果有多一日假，我會好好整理我嘅Bucket List，一有時間就可以Take Action！」
身為視帝嘅馬明，其實從來都冇放低過足球呢個最好朋友，中學時成為校隊代表更曾獲學界冠軍，仲曾多次代表TVB出戰傳媒盃，入行後仍然一有空閒就會同圈中朋友落場踢返場衛生波流返身汗舒壓放鬆，早年就同多位老友加入「無間體育會」，亦係明星隊球員之一，早前盛事美職銀河大軍來港表演賽，馬明亦帶埋老婆靚湯一齊入場，可惜球皇失場未能一睹對方球技喇。
