Marvel新作《神奇4俠：英雄第一步》日前喺香港迪士尼樂園舉行首映禮，中年好聲音家族拉大隊去撐場，當中包括第一次去香港迪士尼嘅羅啟豪，佢喺自己嘅社交平台po出多張相，紀念自己嘅「初體驗」。
Ramon喺樂園影咗好多靚仔相，其中有幾張睇得出佢扮chok都幾有天份，Ramon話估唔到自己第一次踏入香港迪士尼，居然就係樂園20週年參加電影首映禮：「我向來鍾意感人劇情同英雄救世界嘅故事，呢套戲真係有齊晒：有笑、有緊張、有流淚嘅情節，睇完真係好滿足。」佢話多謝樂園嘅邀請，令自己呢個「迪士尼樂園初哥」有個美好嘅初體驗。
當日Ramon亦有把握機會同同場嘅古天樂、伍允龍等集郵。當然唔少得嘅仲有一班中聲大家庭成員，好似黃博、劉洋、李金凱、顏米羔，以及中一生支嚳儀、顏志恒、魏嘉信同陳早怡，支支、Benson同Cris仲帶埋小朋友一齊去玩，非常熱鬧。
