一年一度嘅香港動漫展熱鬧開鑼， 姚焯菲 同 詹天文 都有受邀出席表演，第一次來到動漫展嘅Chantel話感覺好新鮮，估唔到現場有咁多人，尤其見到好多人Cosplay覺得好得意，如果有機會自己都想試下Cosplay小丸子。
聲夢三小花呢日獨缺鍾柔美，雖然Yumi本人冇現身，不過身為好姊妹嘅Chantel同Windy都有幫Yumi澄清緋聞。Chantel就話Yumi單身冇拍拖，俾人影到一齊睇戲嗰位男仔係佢嘅同學，Windy就話私人嘅嘢唔方便幫Yumi作答，不過佢相信Yumi唔會受到緋聞影響心情。
《女神配對計劃》引起全城熱話，除咗5位女神人氣急升，求愛勇士亦受到唔少關注，對Yuki羅毓儀情有獨鍾嘅 T.Max 就指節目播出之後確實多咗工作機會，所以好多謝當初Yuki選擇咗佢。眾所周知Yuki係超級動漫迷，T.MAX就話因為工作好忙，所以未有冇時間約Yuki，不過都希望有朝一日可以同心目中嘅女神一齊行動漫展。
呢日仲見到 方皓玟 ，佢話自己意志力薄弱，次次行呢類展覽都會大失血，好彩囡囡年紀仲細，所以唔需要特別買咩俾佢。至於嚟緊嘅工作計劃，小明就話希望下半年有機會做海外騷。
Winky黃健怡六月宣布退出組合Beanies，呢日佢就單飛表演，講到離隊原因，Winky話仲同公司溝通緊，希望好快可以俾大家一個交代。