開拍前已備受觀眾關注嘅新劇《新聞女王2》， 經過台前幕後嘅努力後，連日嚟都有演員分享煞科嘅消息，呢日主演嘅佘詩曼 Man姐 亦分享咗一條短片指自己都煞科喇！片中分別有阿佘喺深圳同香港煞科嘅片段，亦有佢坦白心聲，話雖然煞科但自己其實有少少唔開心，因為佢唔知自己仲會唔會有機會演Man姐呢個角色，所以會好掛住同唔捨得Man姐呢個角色。
阿佘喺帖文中亦有分享自己唔捨得嘅人同事：「唔捨得晚晚午夜凶鈴監製 @chungshukai 研究劇本！超唔捨得同我朝夕相對一齊奮鬥嘅每一位演員！好唔捨得每日為我們流汗水嘅每一位幕後！最唔捨得當然係沉醉喺Man姐狀態嘅90天！」之後仲用Man姐嘅口肳講出令人不捨嘅一句：「各位哩（呢）節報道嚟到呢度，我係你哋嘅主播文慧心，再見 。」
相比起Man姐嘅傷感，有份喺《新聞女王2》中演出嘅泰臣，就喺社交平台分享令人羨慕嘅負擔。泰臣上載連日嚟同劇組聚會嘅照片，當中有佢同 佘詩曼、王敏奕、高海寧、總監製鍾澍佳、關寶慧及劇組工作人員打邊爐慶祝煞科嘅相，泰臣喺帖文中表示：「撞啱拍攝係煞科場口，結果成個星期連續煞科、慶功、開班、聚舊，晚晚都係雞煲火鍋⋯⋯。我而家想齋食沙律咋。」
