韓國兩大身高顏值天花板，李洙赫、李多熙合作懸疑推理新劇。呢日兩人聯同導演、女團Oh My Girl嘅Arin、李銀泉等出席記招造勢。
新劇改編自人氣網絡漫畫已經備受關注，加上作品獲選為第8屆康城國際劇集展競賽單元作品，李洙赫1月滿約YG，啱啱宣布簽約新娛樂公司同孔明、趙震雄等做同門，呢次擔大旗演出就有咁好嘅成績，佢都話好似發緊夢咁呀。佢表示有日導演打比佢叫佢參加康城影展，佢當時都覺得好愕然，仲話自己飛去康城途中都覺得好唔真實，完全唔敢相信眼前嘅一切。
作為前輩嘅李多熙，呢次喺劇中飾演一位老師，角色性格都有別於以往女強人角色，亦令觀眾眼前一亮。不過李多熙就透露唔止佢有新嘗試，其他演員，特別係Arin為新劇剪去長髮，接近素顏上陣，仲有大家出色嘅表現都令佢非常佩服啊﹗
