2014年由加拿返港參加港姐選美嘅 黃碧蓮 年初離巢後近日公佈人生喜訊，早前於景色絕美嘅山上答應從商嘅圈外男友驚喜求婚，幸福滿瀉。
正忙於籌備婚禮嘅Linna，雖然於溫哥華長大，不過仍非常遵循傳統禮節，星期日雙方進行隆重「過大禮」儀式。現場擺滿鮑參翅肚、 美酒、禮餅等各式聘禮。而六對巨型龍鳳鈪、同大量金飾更令人注目。
即將成為人妻嘅Linna甜蜜指：「雖然我係鬼妹仔，但係跟足傳統做過大禮儀式，而且收到好多親戚朋友嘅祝福，好開心！」早前佢仲同未婚夫拍攝一輯火辣婚照，大露香肩同4吋事業線， 展現完美好身材，仲佩戴價值過百萬港幣嘅鑽石頸鏈同戒指拍攝。
呢輯婚照仲特別選址戀愛時期嘅回憶之地取景，好似首次約會嘅高級餐廳，Linna仲話：「重返舊地感覺真係好特別！好似重新經歷佢當初追我嗰段日子！最難忘係申請到當年約會嘅餐廳拍攝，當年我哋以陌生人身份相遇，而家以未婚夫妻身份返去，真係好有意義！」 
Linna又透露婚禮將於外地舉行，可惜因位置有限，只能邀請至親嘅親朋好友，暫未決定會否於香港補辦婚禮。曾身為兒童節目主持嘅Linna仲話明年馬年別具意義，更有意進行「特別」計劃：「咁啱就係我同我未婚夫媽媽嘅生肖！佢成日話馬係佢嘅幸運星，仲話覺得馬年嘅人特別有鬥心。我哋會順其自然啦，不過我同佢都好鍾意小朋友，或者……都有可能？」
