Joe Junior喺7月22號踏入79歲生日，日前獲一眾好友同資深傳媒人 汪曼玲 等同佢賀壽，而同Joe Junior相愛40載嘅太太Susanna當然亦有陪伴在側一齊慶祝，去年有份參與TVB台慶劇《黑色月光》演出嘅 尹揚明 亦有現身生日會同好友聚舊。
活動除咗賀Joe Junior生日之外，亦係佢同老婆Susanna結婚40周年紀念，夫妻相愛40年依舊表現恩愛羨煞旁人。汪曼玲上載生日會照片，留言恭賀呢對夫婦紅寶石婚雙喜臨門，齊齊慶祝。佢仲分享當晚Joe唱咗多首歌曲，猶谷小型演唱會。更率先大爆Joe明年80歲及入行60年計劃開紀念演唱會，希望大家熱烈支持呀！
Joe Junior自小就喜歡音樂，早喺15歲就同不同好友組band參與音樂活動，曾被封為60年代樂壇寵兒嘅佢，歌唱事業有起有落，至90年代隨家人移民美國後再回流返港發展，成為TVB旗下藝人至今。雖然身為演員，不過Joe Junior一直對唱歌充滿熱誠，不時都會見到佢嘅演出，尤其演唱英文歌特別悅耳，明年入行60周年兼80大壽，相信一定會倍添熱鬧。
