鄔友正為慶祝今個月17號嘅71歲生日，一早就同家人計劃好去歐遊三星期，不過出發前壽星公不慎跌倒，導致右腳板骨裂，但為咗唔令家人失落，鄔友正忍痛上機，全程堅持用拐杖同家人四出遊玩。
不過鄔友正呢次歐遊有唔少阻礙，先係佢出發前就已經受傷，之後太太 翁嘉穗 喺倫敦去羅馬嗰程，就一度唔見咗電話，當電話搵返後，又到行李被遺留咗喺倫敦。而忍痛用拐杖堅持同家人去唔同景點嘅鄔友正，就因為歐洲床褥太軟而搞到瞓捩頸！一度擔心自己係中風嘅鄔友正，喺社交平台發文表示：「原來骨裂好多人都要臥床休息，因為太痛了！屋漏兼逢夜雨，歐洲床褥太軟，瞓捩頸！右腳痛加右頸痛！一場來到歐洲，不甘躲在房間休息，和家人四處走動！最慘就是到了摩納哥，好多斜路同樓梯！要用力撐住拐杖上落，可能拉扯得太緊要，以至右半邊身拉傷！整個右邊身體又痛又感覺麻痹！有少少擔心是中風！右頸痛+右半邊身痛+右腳痛=痛苦的歐洲假期！」
結束咗呢次「痛苦的歐洲假期」後，鄔友正又分享呢次旅程最大嘅收穫，就係令佢戒咗玩社交網站同用手機捉象棋，自言之前因為有網癮，每晚都要用3個鐘上網同打機，但呢次旅行後佢就決定將呢3個鐘改成用1個鐘工作、用個半鐘嚟練習唱歌，備戰《中年好聲音4》。