譚俊彥、郭柏妍、姜大衞、黃庭鋒、黃洛妍等主演嘅新劇《麻雀樂團》終於播出，呢日一眾演員齊齊出席宣傳活動，除咗大玩麻雀遊戲之外，更同就快生日嘅阿Shaun同埋何啟南預祝生日。
飾演麻雀館第二代傳人嘅阿Shaun，呢次喺劇中同John哥有唔少打牌嘅戲份，但講到圈中嘅雀王雀后，John哥就大爆當年肥姐沈殿霞同四哥謝賢都好鍾意打牌，尤其肥姐幾夜都開定枱等大家，而四哥則是千王之王，John哥則自認未夠班只係排第三級，但大家都係小賭怡情玩吓消磨時間。
講到阿仔姜卓文有份參與嘅節目《女神配對計劃》，John哥話自己每集都有捧場，但追女仔就要憑感覺，因為將來係個仔唔係自己，所以一定要揀得啱。不過女神關嘉敏就勝券在握，早已嗌定John哥做老爺，John哥笑指唔知道，但就叫Carman下次見面可以當面叫佢，睇吓啱唔啱Feel。
Rosita為角色作出好大犧牲，除咗剪短20年嘅長髮，更要由零開始學拉大提琴，連Janees同庭鋒都大讚佢好厲害。首次拍劇嘅Janees本色出演自己最擅長嘅小提琴，係個有趣嘅體驗，不過回想自己中文唔叻，當初又唔認識大家又好緊張，拍攝過後原來咁好玩。
此外，廖家爵呢次就有機會同莊易羚有感情線，演情侶原來都唔係咁容易，家爵最初都擔心男女授授不親，後來同對手建立良好溝通，幸好莊易羚亦性格爽朗大家好快投入角色。
《麻雀樂團》星期一至五晚 20:30 翡翠台