陳慧琳 嘅10場紅館演唱會，喺20號晚場次因為颱風關係延期至27號晚舉行，亦變成今次個唱嘅尾場騷。Kelly準備咗多個驚喜送俾歌迷，包括邀請到久未合體演出嘅 草蜢 任嘉賓，去年十月自爆接受切除腦瘤手術嘅 蔡一傑 ，復出登上舞台狀態大勇，三子一出場就全場high爆，草蜢同Kelly合作唱跳唱《熱力節拍Wou Bom Ba》，見傑仔跳舞同狀態完全回復，三子亦將幾日前錄好嘅新歌首度公開獻唱。
傑仔拖住Kelly感觸表示；「今晚係我第一次上返舞台，喺我做完手術出嚟一公布消息時，Kelly係第一個留訊息俾我，佢好擔心我，仲話我個頭開咗咁大條疤痕好心痛，快啲好返加油，鼓勵我，又讚我光頭仍然咁型仔。」Kelly話：「咁真係型，我講真，我都唔識講大話。」阿智又順勢公布草蜢明年4月將再踏紅館開騷，Kelly更一口答應會做嘉賓。
傑仔病癒復出舞台獻出予Kelly，令佢大為感動，更大讚對方專業，病完可以操返一身咁結實嘅肌肉，笑言比自己實淨好多，好respect。
尾場另一驚喜有 馮德倫 現身同 雷頌德 合體，DRY同Kelly多年後再次獻唱《紀念日》呢個畫面，勾起大家嘅集體回憶，Kelly仲相當鬼馬拎起氣球結他同兩人一齊夾Band搞氣氛。事後Kelly表示三人真係好耐冇試過同台，而請得郁Stephen現身純粹係阿Mark嘅力量。
之前同Kelly喺電影中合作無間嘅 鄭伊健 亦現身擔任第9場嘉賓，伊健反而因為場次延期，要臨時改機票先返港，伊健亦好有心將《甘心替代你》首次合唱舞台獻畀Kelly。
另外Kelly16歲兒子蝦蛟仔劉昇被拍到帶同女伴一齊支持媽媽，Kelly就指同行女仔只係同事個女，並笑言唔會再講阿仔嘅嘢俾大家聽，因為返屋企會俾人鬧呀。