世界冠軍級人馬「跳水皇后」 郭晶晶 當年征戰各地，先後獲得4面奧運金牌與及兩面銀牌，更累積多達31次世界冠軍榮譽，雖然佢早已退役，2012年更同 霍啟剛 成婚，婚後成為3名子女嘅媽媽，而世界游泳名人堂2016年已選佢為當年入選人物，表彰佢嘅傑出表現。
霍啟剛近日就公開同晶晶到正舉行世界游泳錦標賽嘅新加坡，接受已頒發多年，不過一直未有時間領取嘅獎項，而老爺霆震霆亦有同行見證呢個輝煌時刻。
獲選加入名人堂嘅佢，係繼前輩周繼紅 高敏 伏明霞 熊倪 孫淑偉 當年同期田亮 後入選嘅中國運動員。雖然晶晶已由運動員身份退役，不過仍有涉獵跳水運動，更以佢多年來嘅頂尖經驗轉化成為裁判身份繼續現身賽場，年前東京奧運，晶晶更親身走到10米跳台上，模擬當年嘅準備情況，相信佢一定非常回味當年嘅一點一滴喇。
老公啟剛指其實晶晶2016年已經入選，但當年因為行程因未能到現場領獎，今年國際游泳名人堂特意補頒獎項。晶晶2009年退役後仍一直心繫跳水運動，現時仲係世界泳聯跳水技術委員會委員，不時以裁判身份參加運動會，貢獻自己嘅力量。
晶晶早喺1992年就獲選為國家跳水隊成員，96年只得15歲已首次挑戰奧運比賽，直至2008年北京奧運連年征戰，累計收穫4金2銀獎牌，總數量唔止超越師姐伏明霞，更係自奧運跳水項目有史以來，獲得最多獎牌嘅女子運動員。
