適逢暑假， 林峯 呢位廿四孝爸爸即使工作多多，都抽時間同太太 張馨月 帶埋5歲愛女Luna出遊。鍚阿囡鍚到濃嘅阿峯，此行同老婆囡囡去暢遊獅城，仲悉心安排家人入住可以睇到魚嘅酒店，令Luna非常開心！
張馨月喺社交平台分享多張旅行相，更以Luna口吻寫道：「我的暑期旅行第一站新加坡。最近迷上了小美人魚，爸爸給我訂了可以在房間看魚的酒店，媽媽給我買了美人魚的衣服，幫我實現了小小願望。」從相中可見，Luna著上美人魚服裝喺水池暢泳，一笑就同爸爸完全係餅印樣，一家三口又喺酒店攬到實一實溫馨合照，真係幸福滿瀉！
除此之外，阿峯又同老婆、囡囡遊覽魚尾獅公園同特式景點，阿峯拖到Luna實一實，兩父女認真挑選玩具，Luna仲同阿峯喺景點排排坐，模仿爸爸喺電影《九龍城寨之圍城》嘅角色「陳洛軍」嘅招牌座姿，兩父女真係似到十足十。
