關智斌 向來係操肌達人，擁有一副好身材嘅佢繼上年參加完一個大型室內健身比賽後，今年又再參賽，仲帶埋同門師弟 楊天宇 以二人組方式參戰！
賽事以一連兩日進行，考驗力量、耐力、協調性三方面，總共要跑8km以及完成8個訓練項目。Kenny喺社交平台分享參與片段同相片，表示自己為參賽練咗足足5個月，由上年唔知頭唔知路跟住隊長參加，半拖半拉完賽，到今年變成小隊長，帶住師弟比賽多咗一份實任感。所以有今次呢個成績，自己從心底開心。
Kenny仲話：「I am so proud of ourselves！由年初我們許下目標，到今天終於完成賽事，而且成績比我們預期中還好，成功突破自己上年的成績，本來希望在一個小時20分鐘內完成，現在是一個小時18分鐘！真的超額完成！」又大讚Angus雖然第一次參加，不過完全沒有放棄過。Angus亦多謝師兄帶自己超越極限，表示：「師兄就是帥。」
同Kenny向來老友嘅阿Sa蔡卓妍亦喺社交平台分享約Kenny食慶功飯嘅相，形容對方係「我的驕傲」之餘，仲留下一句耐人尋味嘅「有生之年唔知我會唔會參加呢？」令Kenny都覆返佢一句叫阿Sa約容祖兒參賽：「不如你同祖祖兩個拍擋，肯定拍咗套喜劇出嚟」。
