蔡一傑 去年宣布接受切除腦部腫瘤手術後就閉關休息，期間不時Post出運動相片，持續保持狀態。近一年未有演出嘅 草蜢 日前就驚喜合體為 陳慧琳 演唱會擔任表演嘉賓，連環唱跳經典快歌，以及新鮮出爐嘅新歌《老的辣》，狀態大勇。
傑仔坦言再踏舞台心情緊張：「第一，做完大手術之後第一次上台；第二，我要喺好短嘅時間學一首全新嘅歌⋯⋯」而阿智就笑言 ：「證實你個腦無事啦！」傑仔就話因插咗新嘅晶片入腦，呢個晶片好犀利，令到佢記嘢快咗，仲勁過AI。」傑仔再踏舞台就話感覺不同：「上台有啲緊張、有啲新鮮感，又驚喎，好似初戀咁，係『初戀呀』嘅感覺！」
阿智指過往佢哋平均每個月上台幾次，相隔一年冇上台表演：「我哋『餓』咗舞台好耐，今日想去表演『飽』，舒服晒！」蘇老闆讚Kelly尾場觀眾特別熱情，令佢哋喺台上表演亦特別開心，傑仔再次感謝Kelly嘅邀請，好榮幸做到佢今次演唱會嘅嘉賓。
傑仔相隔9個月冇上舞台，一路康復中，阿智對傑仔笑說：「算你有口齒啦，因為你喺IG度講過，返上舞台嘅時候一定會帶禮物俾大家，算你有口齒，今日帶咗份新嘅禮物俾大家。」傑仔今次為大家送上全新禮物就係新歌《老的辣》。」
傑仔揚言歡迎大家明年4月喺紅館睇草蜢演唱會繼續玩：「Kelly剛才喺台上講咗會嚟做我哋嘉賓，哈哈，Kelly，你走唔甩架啦！」阿智亦開心宣布佢哋終於排除萬難，申請到明年4月紅館檔期。
未來呢幾個月，草蜢將非常努力籌備40周年專集，同埋草蜢要履行之前因傑仔生病受影響嘅演出合約，包括幾站巡演，作為明年4月草蜢全新演唱會熱身！
