視帝 譚俊彥Shaun 7月30號踏入45歲生日，適逢新劇《麻雀樂團》推出，近日Shaun密密現身宣傳活動同粉絲見面。
而踏入生日嘅一刻，Shaun就感觸喺社交平台出post，上載同爸爸狄龍以及媽媽陶敏明一家三口合照，仲指呢張相係今年收到最好嘅一份生日禮物，人越大就希望保留更多美好嘅回憶，見到爸爸同媽媽嘅笑容係無價嘅，Shaun會好好珍惜呢一張「全家福」。
其實呢張相極具紀念價值，因為係狄龍日前喺馬來西亞獲頒終身成就獎後，爸爸捧住獎項嘅全家福。相中狄龍精神飽滿，展現幸福愉快嘅笑容，當晚狄龍大哥更以流利英語致辭，Shaun則暪住爸爸驚喜上台獻花，父子擁抱場面感人。
Shaun又係帖文中感謝所有粉絲多年嚟嘅支持同愛護，因為每次有劇上佢哋都會不遺餘力咁幫忙宣傳，令佢得到更多人認識，非常感恩粉絲們一直陪伴，佢仲許諾會繼續努力拍多啲好戲回饋觀眾。又感謝一班共同出生入死嘅同事個個咁好愛錫自己，喺TVB呢個大家庭工作中同佢哋過咗咁多個生日，每一個都銘記於心。
最後Shaun當然不忘感謝背後嘅最強後盾，大讚老婆持家有道，令佢有個好有愛嘅家庭，每日都充滿力量，更加堅強更加努力去面對每一日遇到嘅挑戰。I love you all.呢個幸福嘅生日宣言真係閃爆，圈中好友佘詩曼、陳山聰、呂慧儀等都為Shaun送上生日祝福。