雖然今年因為閏六月，10月初先過中秋節，不過唔少品牌已開始為今年嘅月餅宣傳喇，好似近日帶埋妻小到新加坡旅行嘅 林峯 任全球代言嘅月餅廣告亦會於8月1號晚首播，林峯同一眾演員穿梭香港大街小巷，以輕鬆活潑方式帶出最地道香港情懷。
為呈現港味中秋氣氛，製作團隊挑選多個具本地特色場景拍攝，好似聞名國際嘅半山行人扶手電梯到充滿街頭藝術氣息嘅中環各個塗鴉牆，以及珍藏老香港回憶嘅古物店等，阿峯同其他演員將街頭巷尾生活氣息融入廣告故事。
廣告拍攝又採用綠幕技術打造開場充滿戲劇張力嘅「英雄救美」場景。林峯上陣於巨大鉛球上拍攝，阿峯亦都話：「今次有戲中戲嘅橋段，亦加入綠幕技術拍攝手法，希望大家會感受到我哋嘅誠意。」
廣告壓軸場景於中環一間餐廳天台精心搭建，團隊以多盞燈籠打造出濃郁中秋氣氛，又欲泡泡機營造浪漫「飄雪」效果。唔止令阿峯同在場所有人都讚嘆，仲吸引埋附近途人駐足觀看，仲有人以為中環「落雪」呀。
阿峯又分享過往嘅中秋趣事：「我好鍾意食蛋黃蓮蓉月餅，所以廿幾歲時試過自己一晚食晒一個六黃蓮蓉月。不過人大咗會想同屋企人分享，好似我囡囡喺口味同我好似，佢都鍾意食蛋黃同流心奶黃月餅，所以同佢一齊食會好開心。」
