陳俞霏 任永健 呢對《中聲2》好朋友，日前大搞動漫主題Fans meeting，唔少Fans仲帶埋小朋友Cosplay現身活動。活動除咗為同歌迷聯歡之餘，亦為一個癌病基金籌款，所以兩位都落力表演，又演唱喺參賽《中年好聲音2》時合作嘅歌曲《給我感覺》，現場氣氛熱鬧。
任永健呢日仲帶埋囝囝到場感受氣氛，霏霏就話本身都想帶囡囡一齊玩，不過自己有啲身體不適，避免傳染，所以下次先再同囡囡玩過。
任永健喺見面會上演唱新歌《鋼鐵爸爸》，佢希望透過歌曲勸勉大家珍惜同家人嘅關係仲有相處時間。任永健都好感謝霏霏仗義相助，喺新歌製作過程中幫咗唔少忙，霏霏更特意為老友搵到一位內地知名音樂人做編曲添！
