參加《中聲3》為大家帶來勵志人生故事同積極生活態度嘅 李金凱 ，即將推出佢嘅首支個人歌曲，「凱兒」早前為新歌錄音時，就正式為大家開估新曲《多愛多愛》將係廣東話演唱嘅歌曲喇。
新歌由張家誠同金凱一齊作曲，而自細就聽唔少廣東歌嘅金凱，就話要向港樂致敬，仲被張家誠稱讚佢錄音時有天王劉德華嘅感覺呀。金凱指如果冇當年港樂嘅熏陶，就唔會有今日嘅發展，仲認為係當年一首又一首金曲，將自己引領來港參賽。
佢又話自己嘅想法同發揮空間都獲張家誠接受，更笑指自己對自己都冇咁有耐性呀。呢首帶有遺憾嘅情歌，加上金凱嘅聲線同過往情路經歷，演繹就更有味道喇，佢仲笑指自己有可能一直單身，但係亦唔會排斥感情嘅來臨咁話。
