洪卓立（Ken）近年身形時瘦時暴脹，同初出道時嘅清新花美男形象大違相反，體重一度超過200磅，加上阿Ken曾因爆肺兼肺積水，被迫停工休息近兩年，又多次被網民誤傳死訊，所以粉絲一直對佢嘅身體情況好擔心。
最近阿Ken就喺社交平台嘅限時動態大玩Q&A，表示：「喜歡聽故事的我，很久沒當樹窿。」對於網民投稿嘅工作、感情、家庭等方面嘅問題，阿Ken逐一回覆。
有網民提問「人生中有沒有一些令你覺得後悔的事」，阿Ken就話自己因長期食安眠藥致產生依賴，甚至因藥物影響出現神志不清：「現在甚至吃了也睡不到，吃了安眠藥會神志不清，做出一些我解釋不到的事情，試過早上看到一碗煮好的麵放在桌上，但是放太久吸乾了水的，就是煮完太累又走去睡覺。」而佢透露自己聲音永久勞損，仍然想繼續唱歌，希望為觀眾帶正能量。
至於講到對感情睇法，阿Ken就話自己已38歲，目前唔急搵另一半，雖然「陪伴」對自己好重要，但一個人有一個人好處，要搵就想搵一個可以長相廝守嘅人，一切隨緣面對。
