TVB歌唱選秀節目《中年好聲音4》正進行海外賽區海選，譚俊彥Shaun 及《中年好聲音3》嘅畢業生 王鄭浚仁Rax ，上星期就去咗馬來西亞及新加坡，擔任當地兩場海選嘅特別嘉賓，順道與當地fans見面。
二人喺26號去到馬來西亞吉隆坡Pavilion Damansara Heights出席《中4》大馬賽區嘅海選，幾位曾參加《中3》嘅大馬選手 劉傳民Andy、蕭偉倫Alan 及 何平秋Catherine，以師兄師姐身份出席活動為海選參賽者打氣，而Shaun同Rax亦有上台表演，Shaun 獻唱自己主演熱播新劇《麻雀樂團》中嘅插曲《與我常在》及英文歌《Wonderful Tonight》，並走落台同觀眾近距離互動。至於Rax則獻唱《愛火花》、《I Will Always Love You》等歌曲，再展現佢嘅招牌「海豚音」，引起現場歡呼。
海選結束後，Shaun隨即出席當地舉行嘅《第8屆馬來西亞國際電影節》，並為「終身成就獎」擔任頒獎嘉賓，而得獎者正係Shaun嘅父親、著名武打明星狄龍。事前狄龍並唔知Shaun會到場，當佢喺台上準備致辭時，Shaun從後台走到台前，手捧獎座同花束為父親送上祝賀，兩人深情擁抱，場面感人。
Shaun表示呢次出席頒獎典禮，自己其中一個準備，就係着咗身上呢套西裝：「我公公即係我媽媽嘅爸爸，係一個裁縫，呢一套西裝係佢造畀我嘅，佢希望我喺一啲重要嘅時候，可以有一套出嚟見得人嘅西裝。雖然我公公已經走咗好耐，但係我覺得我應該身穿呢一套西裝，去做呢一件咁值得紀念嘅事。我同我媽媽講嘅時候，我淨係想話畀佢知，其實今日我哋一家人全部都喺度，我哋一家三口相聚嘅時間雖然唔多，但係我就好珍惜每一個可以一齊嘅機會﹗」
事後Shaun喺社交平台分享與父母一家三口嘅合照，並指呢張全家幅係佢今年收到最好嘅生日禮物，帖文中Shaun寫道：「人越大就希望保留更多美好嘅回憶，我爸爸同我媽媽嘅笑容，係無價嘅。我將會好好珍惜呢一張全家福」同時佢亦感謝fans多年嘅支持同愛護、感謝一班同佢出生入死嘅同事，同埋感謝太太對佢嘅包容和愛護。
由於呢次新馬行程相當緊湊，所以Shaun同Rax 喺27號旋即飛抵新加坡，出席《中4》新加坡賽區嘅海選。兩位型男Shaun及Rax專心欣賞參賽者嘅演出，其間在場嘅工作人員製造驚喜，為Shaun送上生日蛋糕，為30號生日嘅佢慶祝。
海選後兩人隨即出席「TVB藝人粉絲見面會」，Shaun表示自己對上一次到新加坡宣傳已經係2018年，所以難得嚟到當地，就話要品嚐雞飯及印度煎餅。Shaun為現場觀眾演唱劇集《換命真相》主題曲《只因深愛你》，其後又呼籲新加坡朋友支持新劇《麻雀樂團》，佢仲自詡為「灣仔麻雀小王子」，又獻唱劇集插曲《與我常在》。Shaun 同 Rax喺見面會上與觀眾大玩問答遊戲，之後Rax 獻唱令佢人氣爆紅嘅代表作《同花順》，同《Fly Me to the Moon》，將現場氣氛昇華。
