余香凝（Jennifer）早前獲邀擔任第8屆馬來西亞國際電影節評審之一，對於首次擔任電影節評審，Jennifer深感榮幸，表示做評審責任重大，最開心係有機會跟世界各地熱愛電影嘅人士聚首討論，仲遇見好多出色演員。
Jennifer此行獲益良多，決賽前一口氣睇晒9部電影，當中8部電影係外語片：「今次見識到世界各地不同文化，佢哋透過電影表達想表達嘅事，好多都係我以前未必可以太深入了解到嘅角度，真係大開眼界，亦好欣賞佢哋嘅製作。」
雖然身為評審，但Jennifer認為自己係以學習心態去做今次評審，一邊吸收各地「精華」，一邊做評審選出獎項。
曾演出不少電影作品嘅Jennifer，過往以競逐者身份角逐過不少獎項，呢次擔任評審，被問係咪心情輕鬆啲，Jennifer認為責任好大，人哋得唔得到獎決定權就喺自己手，今次評審團有好多專業人士，尤其評審團主席係奧斯卡級導演，帶領佢哋經過多番討論選出獎項，雖然過程大家意見會有唔同，但經過討論後，大家最終會決定個獎項，Jennifer話其實唔係輕鬆，心情係好緊張，要好審慎去選擇，亦要好好分析每套戲背後嘅意思，同埋每位演員背後嘅努力，Jennifer就恭喜一眾得獎者，特別恭喜狄龍大哥榮獲終身成就獎。
Jennifer透露最欣賞係評審之一、來自印尼嘅男演員Reza Rahadian，「佢從影20幾年，非常專業，佢除咗係演員，最近仲挑戰做導演，非常厲害，我都想向佢學習，可以喺演員以外嘅崗位發揮到。」Jennifer今次馬國之行，因要專注工作而未有帶小朋友同行，不過佢有順道探望廖子妤媽咪，同埋行咗夜巿，食咗少少當地美食。
