今個星期繼續由TVB娛樂新聞台主播 王鎮泉Jeoffrey 帶觀眾睇吓《電影泉攻略》有咩電影資訊。重啟版電影《Wonder Woman》正加緊腳步籌備中，好多人想知道邊個取代本身已係完美人選嘅Gal Gadot，成為新一代神奇女俠；今次被委以重任就係電影《Supergirl》編劇Ana Nogueira，佢除咗要擔大旗寫重啟版電影《Wonder Woman》，同時仲寫緊真人版《Teen Titans》嘅劇本！
最近有傳媒透露《超人》嘅片酬消息仲講到似層層，有傳男女主角David Corenswet及Rachel Brosnahan疑因知名度唔高，片酬為75萬美元；飾演反派「雷克斯路瑟」Nicholas Hoult片酬為200萬美元，再加票房分紅；而全片最高片酬就係導演James Gunn，片酬高達1500萬美元，未計James Gunn擔任DC工作室聯合主席兼執行長嘅七位數年薪。
本周電影新片速遞有《壞蛋聯盟2》話說舊罪犯班底老友鬼鬼，位位曾經叱咤風雲現今已改邪歸正，點知無啦啦捲入一場橫跨全球嘅驚天大劫案，被迫重操「壞」故業，食腦大鬥法；推動呢場案件幕後黑手，竟然係新犯罪團隊——壞蛋妹！
《神探零零甩》搵勻成個地球，只有一個人，會跟足佢老竇嗰套，用癲到無倫嘅方法， 去領導警隊同拯救世界，佢就係神探零零甩，由《救參96小時》系列男星里安尼遜主演，一齊再起瘋雲！
《全知讀者視角：滅世預言》小說描繪嘅末日世界變成現實，只有一個人知道呢部小說嘅結局，一本名為《在滅亡的世界中存活的三種方法》冷門小說嘅唯一讀者金獨子發現小說中嘅末日浩劫竟成為現實，主角劉眾赫更出現喺面前，作為唯一知道點係呢個世界生存嘅人，決定與同伴通過寫出新結局嚟拯救世界。
本周電影龍虎榜就有第1位《神奇4俠：英雄第一步》 、第2位《電影多啦A夢：大雄之繪畫世界物語》 、第3位《F1電影》。
