《2025香港小姐競選》14位候選佳麗齊齊出發去檳城拍攝外景，隨團出發嘅仲有師姐劉佩玥同袁偉豪，大隊出發前舉行拜神儀式祈求拍攝順利。阿Moon首次做港姐外景嘉賓，笑稱自己雖然要求嚴謹，但會係氣氛擔當，更向一眾小師妹大派貼士。
阿Moon就話唔需要對鏡頭展現刻意一面，反而自然流露係最好，最重要係記得笑多啲，因為可以紓緩緊張。而阿Moon好難忘自己參選時嘅台北之旅，因為唔只係比賽咁簡單，當中可以學到人際關係、面對鏡頭，一切都係珍貴經驗。
阿Ben老婆張寶兒陀緊第二胎已六個月，為咗今次拍攝阿Ben要暫別家庭，雖然只係幾日，但佢有啲唔捨得。阿Ben笑言因知道一班佳麗學識廣博，所以佢想趁呢次行程幫囝囝袁咕碌物色補習姐姐。
阿Ben同阿Moon係大馬視帝、視后，一班佳麗們見到兩位偶像都好期待同佢哋有合作火花，又大讚兩位係男神同女神。1號李尹嫣就話參選時被問最鍾意邊幾個港姐，佢就話係阿Moon，可以同偶像一齊同行，令佢心情都好興奮。2號甘詠寧好期待向兩位取更多經，至於8號岳凡荻淨係見到阿Moon已經令佢好開心喇！
檳城嘅美食同風土民情都係今次拍攝外景嘅重點，4號莫凡同9號陳詠詩對嚟緊嘅行程未出發先興奮。莫凡自爆兒時有個花名叫「榴蓮妹」，所以佢好期待食當地嘅榴蓮，7號施宇琪就話自己要乖乖節食，保持身材，所以已經執好五日要食嘅健康食物落行李。
