狄龍入行57年拍過無數經典電影，日前佢喺《第8屆馬來西亞國際電影節》獲頒終身成就獎，狄龍多年嚟對太太陶敏明一往情深，對朋友更係肝膽相照。狄龍早前悲痛送別摯友唐佳及其妻雪妮，須由兒子譚俊彥及太太攙扶，佢近日受訪講起另一故友張國榮（Leslie），狄龍亦悲從中來。
狄龍喺馬來西亞接受訪問時，被問電影《流星語》拍攝細節，佢當年憑「警官龍Sir」獲第19屆香港電影金像獎最佳男配角，講到呢部戲當時唔夠錢拍，哥哥張國榮話唔收片酬，將呢個故事拍好畀大家欣賞，狄龍頓時往事回憶湧上心頭，崩潰老淚縱橫，一度無法言語，其後表示「我好掛住佢」。
狄龍邊講邊喊，話最近要登台就想唱幾句歌詞，佢哽咽唱出張國榮經典歌《當年情》嘅幾句歌詞，「輕輕說聲 你為我送溫暖 你為我注入快樂強電」，之後狄龍抹去眼淚並續道：「Leslie係冇得頂，對唔住呀各位，我情不自禁，我應該有強忍眼淚嘅能力。」當現場記者指真情流露冇問題，狄龍自認唔夠專業：「唔應該唔應該，我係專業演員，我失敗咗，今日冇準備係咁樣，今日我係過度投入，生離死別係好痛。」
