柯煒林（Will）日前喺社交平台公開患上肺腺癌四期嘅消息，唔少網民感到震驚，亦對為阿Will打氣祝福。表示會「如常生活，生活如常」嘅佢對抗癌之路保持樂觀態度，更開直播同網民傾偈，吸引咗3000幾人收睇，令阿Will都忍唔住話：「三千幾人睇我講抗癌！我慣咗之前得幾十人睇。」
至於講到目前情況，阿Will就話會努力打敗癌症，但自己都做好「有可能輸」嘅心理準備：「我要接受有可能輸，因為接受可能輸嘅時候，就無嘢再驚，剩低嘅就係好好向前行」雖然喺直播時阿Will都會咳，但佢話已經冇之前咳得咁犀利，目前仲行得走得，希望呢段蜜月期唔好咁快過。而且醫生表示，呢個病係可以食藥控制，唔需要做標靶藥以外嘅治療，所以佢都好感恩自己而家仲可以如常生活。
阿Will喺直播亦叫大家唔好稱佢「抗癌勇士」、「抗癌小鬥士」，因為佢要樂觀面對，做一個「要攤喺度嘅抗癌小廢青」。
