樂於行善嘅 薛家燕 即將聯同KOL Vivi舉行義賣活動，家燕姐更捐出400至500件二手衫義賣，當中包括登台戰衣、晚裝、套裝以及喺節目上着過嘅服裝，好多二手衫都係着過一兩次，非常新淨，淨係執衫都花咗家燕姐兩、三個月時間。家燕姐就話自己每年花費二、三十萬去租地方擺放靚衫，但着嘅機會唔多，與其浪費，不如拎出嚟做善事
家燕姐每套衫都咁靚，要斷捨離真係要落好大決心，所以佢喺整理時發現有唔捨得嘅衫，都會上身試一試，啱身就決定拎返屋企自己著。
喺云云嘅靚衫當中，總有某幾套係令觀眾特別有印象，之不過呢啲咁經典嘅服裝，就可能有錢都買唔到。其中包括一套「登基衫」，呢套衫喺幾年前義賣中出現過，最後由Vivi出錢買返以作留念，而另一套《食神》經典戲服已經被Vivi買走做永久留念！
