高海寧 （高Ling）獲 馬國明 帶挈接捧擔任一個活動宣傳大使，講到Shopping，馬明功力肯定冇高Ling深厚，不過高Ling就話真正購物高手係馬太 湯洛雯 先啱！高Ling大讚靚湯「好買得」亦好識買嘢，自己同馬明一樣係鍾意賺錢，所以會就住就住。
網購早已成為香港人嘅日常，高Ling近年進軍直播帶貨，買嘢同Sell嘢一樣應付自如。高Ling話帶貨令自己好開心，因為自己對產品非常執著、同鍾意試新嘢，自己會做好多功課同試產品再分享，佢覺得大家會感受到呢份真誠同用心。
雖然高Ling工作繁忙，連媽媽生日都要開工，但作為廿四孝囡囡，佢特別邀請咗媽咪一齊到場，為媽咪準備咗生日驚喜，之後再食飯慶祝。高Ling話高媽媽唔捨得自己使錢，一家人更享受聚埋一齊食飯嘅感覺，而高Ling都想抽時間帶家人去旅行，好好珍惜相處時光。
