何雁詩 鄭俊弘 趁暑假帶住囝囝Asher到沖繩旅行，一家人呢次仲去咗開幕數日已經劣評如潮嘅恐龍主題樂園，Step更拍片分享「試伏過程」，表示「明知山有虎，偏向虎山行。」
Step就指樂園風景好靚，但適合幼童玩嘅項目只有三個，一開始Asher喺玩一個坐小火車嘅遊戲都好開心，但去到下一個睇劇場嘅項目時，Asher就因為演員太大聲而嚇到喊。到最後一個Game就係樂園主打，亦係園中唯二同恐龍有關嘅遊戲項目，Step就話本身見到App顯示要等5小時先有得玩，但去到一睇只需要排20分鐘就可以玩。
完成呢個試伏之旅後，Step覺得樂園唔適合幼童玩，但大人如果唔介意排隊，喺平日都可以抱郊遊心態一玩咁話。
鄭氏一家呢次日本遊，其實撞正日本氣象廳向多個地區，包括沖繩縣沿岸發出海嘯警報。但佢哋一家三口就表現冷靜，Step就為連收三個海嘯警報而無法落水衝浪感到可惜。不過喺佢哋為Asher開設嘅社交平台帳號可見，一家三口都有把握落水機會，喜愛游水嘅Asher一落到水亦好開心，連老師都話Asher係自己見過玩水時最快樂嘅小朋友。
