楊潮凱呢位廿四孝爸爸顧家又錫一對仔女，佢嘅細仔雞蛋仔話咁快就一歲喇！潮凱同太太就為囝囝搞咗一個以動畫電影《超人特攻隊》做主題嘅生日派對，一家四口大玩Cosplay神還原電影中，主角一家嘅裝扮。潮凱仲話，大女Catharine神還原戲中嘅家姐角色，係全場MVP。
囝囝眨眼滿一歲，都令潮凱覺得好感觸，佢撰文感謝雞蛋仔選擇嚟呢個屋企，仲話囝囝一出世好似隻馬騮仔，非常瘦，估唔到一年之後已經急速成長到同電影中嘅「Jack Jack BB」一樣，所以先會想搞呢個Cosplay生日會。
潮凱仲話囝囝係一個「天使BB 」，每日瞓醒就會對住大家笑，好少扭計，唔會無端端大喊，又會乖乖地瞓覺。喺文末，潮凱更為囝囝送上生日祝福：「我哋一家人都好愛你，你要繼續快樂，幸福地成長！Love you my boy❤️」
