鄺玲玲 同 Orm 因為年前合作GL劇《我們的秘密》爆紅，熱潮更席捲東南亞各地，兩人嘅Fans見面會開完再開未停過，仲獲名牌邀請孖公仔飛到歐洲出席活動，風頭非常強勁。製作《我》劇嘅泰國電視台，去年9月已經宣佈呢對黃金組合將再次合作，而新劇7月中終於正式播出，兩人將再次成為螢幕CP。
新劇《Only You》已有台灣平台緊貼播出，而 myTV SUPER 亦公佈不日就會為香港觀眾推出，劇中鄺玲玲同Orm係一對高中已相識嘅同學，當年Orm已對玲玲有好感而暗戀對方，畢業後兩人各自發展，後來成為女明星嘅Orm因需聘用保鑣而再次同玲玲偶遇，兩人再次合作產生大量粉紅泡泡。
劇組社交平台亦緊貼劇情，每周播出前都於網上公開唔少拍攝花絮同劇照，務求先甜死冧暈一眾Fans，近日就公開Orm遇兇徒以不明液體襲擊淋潑，玲玲灑灑擋駕嘅靚相喇，不過話說，保鑣仲著得靚過明星老闆真係得嘅咩？
