《2025港姐特訓班》第二集，輪到7至14號嘅佳麗接受才藝挑戰，四位師姐謝寧、陳法蓉、朱凱婷、麥美恩對幾位師妹都有唔同嘅評價。喺海外讀書時有啦啦隊經驗嘅9號陳詠詩就話，要著住四吋高踭鞋跳啦啦隊舞蹈真係好有難度，係一個新嘅經驗。
8號岳凡荻（Fandi）同14號何詠多分別挑戰經典劇《溏心風暴》以及《他來自江湖》嘅場面，Fandi雖然廣東話咬字未夠正，但佢嘅不經意爆肚就連鄧智堅都差啲接唔到招。Fandi就話爆肚都係自己意料之外嘅事，因為當時浸沉喺戲劇氛圍之中，所以都學識「導演未叫Cut要一直演落去」嘅道理。
至於挑戰《他來自江湖》嘅何詠多就話，自己睇過周星馳大部分戲劇作品，加上自己以前中學有讀戲劇，所以自己好開心可以演到呢一套戲。至於拍喊戲嘅入戲方式，佢就話會諗啲傷心嘅嘢，令自己喊出嚟。
13號袁文靜󠄉由參選入圍先開始學習講廣東話，短短時間由完全唔識聽去到識得講，佢仲大膽玩Rap挑戰自我。呢段Rap仲要係佢喺拍攝前一日先學，可以咁快上口，不愧係美貌與智慧並重嘅港姐入圍佳麗。
