炎夏高溫好似想曬到大家變人乾咁，既濕又焗嘅天氣，真係令人難以提起精神走到出戶外返工。不過正係青春年華尚未畢業嘅同學仔就唔同喇，每年暑假都係佢哋最期待嘅日子，唔使返學對住如山功課考試壓力，仲可以出去盡情玩，完全無後顧之憂，諗起都懷念呀。
好似早前先一齊喺廣州開完音樂會嘅三小花姚焯菲、鍾柔美同詹天文咁，就各自有唔同活動喇。Chantel日前先約埋音樂劇《三．八》拍檔見面，同步就專心宣傳新歌《KMC》同參與《愛．回家》演出。
而 Yumi 暑假初期先去完歐洲旅行，日前突被指同男伴「拍拖」睇戲，已遭佢否認，佢亦未理外界傳聞，著起粉紅色比堅尼襯埋同色手機外殼出海船P，大曬青春氣息。
少女嘅夏日總係七彩斑斕，有人鍾意戶外活動，Windy就選擇優雅High Tea喇，暫時放假唔使港粵兩邊走嘅佢，就一身全白打扮到高級酒店嘆返個下午茶，身材纖瘦嘅佢仲似乎對滿枱美食愛不惜手呀。
