因為喺周星馳電影中留鬚反串扮演「如花」而為觀眾熟悉嘅李健仁，2019年不幸中風，經搶救後雖脫離生命危險，但由於腦部受損，令佢右邊身癱瘓兼失去語言能力，日常如廁等都不能自理。
李健仁2020年曾於社交平台交代病況，佢指自己正努力治療中，除咗睇中醫外，仲有言語治療及物理治療，文中李健仁更感謝喺佢出事後一直幫助佢嘅人，當中包括劉鑾雄太太甘比、演藝人協會會長古天樂同好友李建邦。經過年多嘅治療後，佢嘅病況亦終於好轉，2022年更復出客串「甜筒輝」鄭文輝投資嘅電影。
導演李力持日前喺社交平台分享同李健仁見面嘅短片，並於帖文中寫道：「李健仁，也就是大家熟悉的『如花』，近況是正在積極復健，希望能重返幕前。 2019年，他因中風導致半身癱瘓，經過開腦手術和長期的物理治療，現在已經可以站立，也能和人簡單交流。 雖然消瘦了一些，但氣色看起來還不錯。」
片中所見李健仁雖然清減咗唔少，不過精神唔錯，李力持亦指李健仁嘅胃口不俗，但係行路就麻麻，講嘢亦都要再多啲練習。而李力持講完後，唔知李健仁係咪配合搞怪，咿咿啊啊咁講咗幾句，但就難以聽出佢想表達啲咩，直到李力持同佢碰杯互道身體健康時，李健仁先清晰講咗句「身體健康」。
