內地演員 此沙 因為演出《封神》電影系列而為人熟悉，亦係近年人氣急升嘅男神，此沙除咗曾應邀來港拍戲，內地亦同樣片約不斷。最近佢就同成龍、梁家輝等合作全新警匪片，呢日佢現身上海，破天荒一次過為自己兩個專屬蠟像揭幕，一個係新戲角色造型，另一個就著住四川彝族傳統民族服，威水度打孖上呀。
此沙出晒名係彝族俊男，而儀式上此沙亦重現家鄉火把節嘅熱鬧氣氛。佢亦牽細講解彝族民族服嘅細節，仲向在場嘅粉絲話，希望有機會帶大家去自己長大嘅大涼山，親自為大家介紹當地文化。
此沙轉個頭又以新戲造型現身，因為戲中佢扮演雙胞胎兄弟，佢以雙胞胎大哥全能殺手嘅留鬚Look出現，而蠟像就採用咗雙胞胎細佬職業黑客嘅四眼仔造型。一人分飾兩角嘅佢透露，自己性格上同細佬有一啲相似，表面上細佬熙蒙睇落高傲，其實好嚮往自由，思想上比較單純，呢方面同佢本人非常似，就好似自己當年一心想做個好演員由四川出外打拼，自己呢種比較幼稚嘅想法同角色感覺一樣。
