譚俊彥 (Shaun) 早前赴馬來西亞為《中年好聲音4》嘅海選任嘉賓，仲順道為爸爸狄龍預備咗個大驚喜，突然現身《第八屆馬來西亞國際電影節頒獎禮》，祝賀爸爸獲頒終身成就獎。
Shaun即場送上鮮花同擁抱，而狄龍大哥鮮有當眾輕錫兒子面頰一啖，難得大騷父子情。有乖仔同台下嘅太太一齊見證人生重要一刻，狄龍大哥更難得展現幽默一面，以英文叫大家唔駛擔心自己嘅謝辭會又長又譖，仲打趣指會好似迷你裙一樣咁短喎。78歲嘅狄龍大哥話唔擔心自己年華老去，仲指自己正值黃金時期。
狄龍大哥又公開放閃，大讚太太陶敏明係人生最好嘅朋友，同時亦係最大嘅敵人，希望太太可以陪自己共度餘生。狄龍大哥最後亦拉埋Shaun一齊公開多謝陶敏明，超級溫情。
其實呢個驚喜係Shaun一手策劃，為免穿煲佢一早就夾埋大會、當地媒體，連化妝師都一齊幫手瞞住爸爸。Shaun先話自己安排唔到去頒獎禮，而其間狄龍大哥亦有提過希望去《中聲4》海選現場支持Shaun，不過Shaun就請工作人員講善意嘅大話，話交通上會塞車安排唔到。
最終Shaun好開心成功送驚喜，當日更同父母爸一齊影返張全家福，仲話呢張相係今年最好嘅生日禮物。
因為之後要趕往新加坡工作，所以Shaun未有時間同爸爸食飯慶祝，不過就透露最近新劇《麻雀樂團》播出，過住退休生活嘅狄龍大哥不時收睇﹐仲畀咗唔少意見，因為新作令佢同父母間嘅話題亦多咗好多。