周吉佩 由Busking歌手、成立樂隊、再去到將軍澳工業村排隊參加《中年好聲音》，當中嘅路程並非以小時計算。因為喜歡唱歌而年復一年，由當年商場現場演出嘅表演者，慢慢訓練內向嘅自己由變得外向，為吉吉帶來唔少重提仍然非常有趣嘅經驗。
吉吉喺今集《Sing光路上》就同 潘盈慧 分享多年來嘅小故事。
現今社會講出身、講起跑線，每時每刻都處於比較爭勝狀態嘅病態社會當中。而吉吉出身自山邊寮屋，連基本廁所都冇，亦可證人最需要嘅係努力不懈，人到中年一樣有出頭天。
一支二手結他，由爸爸手上奏出悠揚樂韻，亦令吉吉呢個十零歲初中生燃點對音樂嘅興趣，自始因為鍾意而沉迷自學，報名《中聲》亦純粹因為鍾意唱歌，有機會再上舞台而一試。
當年向太太許諾最後一次參賽，結果一躍成為冠軍，吉吉指假若未有成績，自己仍然會繼續歌唱，只不過係會以唔同平台演出：「我估到80歲我仲會唱」。雖然口講「堅持」只係兩個字，不過吉吉亦指多年來堅持其實非常困難，如今成績確實得來不易。
曾任主持同記者工作嘅吉吉，同樣有豐富採訪拍攝經驗，最令佢印象深刻嘅就係同「星爺」互動，完全冇諗過可以「指示」全球知名嘅無厘頭之王拍攝。雖然經驗非常有趣，不過吉吉就坦言呢項工作並非自己嘅最愛，但同時亦有機會令自己未有脫離娛樂圈。
今集吉吉抽到分享佢同太太Louise之間嘅愛情故事，當時從屬兩個電視台嘅佢哋，竟因為「外母」當時一句面相好，加上機緣巧合朋友介紹下認識，仲因為吉吉嘅死纏爛打而成功發展。點知Louise真係帶吉吉見家長之後，後來嘅外母大人先講一句，係「呢種面相」好，而唔係吉吉個人好咁話，認真不得了，亦證明Louise聽話又乖女，更係堅持到媽咪話好就一定要收歸旗下做老公呀。
