今年係香港電影業嘅寒冬，為咗解開呢個困局，各界都出謀獻計，先有旅發局將電影《九龍城寨之圍城》50個場景，重新搭建喺九龍寨城公園入面；近日喺中環大館亦有另一個關於香港經典臥底警匪電影嘅展覽。
霍啟剛喺4號於社交平台Po出到大館參觀「光影邊緣 — 香港電影的臥底世界」展覽嘅相片，佢喺帖文中驚嘆策展人 導演陳詠燊Sunny ，可以同團隊喺短短幾個月，就製作出一個咁高水準嘅展覽。
展覽中將八套經典臥底電影嘅靈魂場景重現，當中有《無間道》陳永仁用打石膏手喺窗邊打摩斯密碼畀黃Sir嘅場景、《掃毒》嘅車禍現場、《辣手神探》嘅亂戰茶樓等，霍啟剛仲將手套入石膏模中，化身成陳永仁打卡留念。
霍啟剛表示自己警匪片睇得多，但係一個關於臥底主題嘅展覽就真係第一次睇，佢指成個展覽中令佢最震撼嘅，係兩架「破窗而入」嘅真車裝置：「策展團隊要將成架車拆件運入大館再重組，嗰份對細節嘅執著，正正體現香港電影人『冇嘢係不可能』嘅精神。」