《東張西望》一向跟進各大騙案，提醒市民要提高警覺，有時百忙之中真係防不勝防，連見慣世面嘅林盛斌（Bob）都中招，話要報《東張》！事緣阿Bob早前接到單job，有一位自稱喺老人院負責行政嘅「李先生」話想搵阿Bob做代言人拍廣告、做吓宣傳，傾好晒報價同合作方案，當阿Bob上去老人院，卻被接待處職員告知： 「李生？邊個李生？我哋呢度冇呢個人。」
阿Bob今日喺社交平台分享咗一個卡片，話自己喺兩個星期前，收到一個自稱旺角一間老人院嘅負責人「李先生」，想搵阿Bob做代言人拍廣告，仲想叫阿Bob旗下嘅公司幫忙喺唔同媒體落廣告， 起初阿Bob經理人Kaman同對方溝通咗好幾次，感覺係正常嘅， 傾代言人價錢同詳細嘅工作內容， 更專登約埋電話會議，由對方直接溝通落實。
阿Bob以為「job confirmed」，上星期五下晝三點約客戶及廣告導演開會，想大家先見吓面，同時睇吓老人院實質環境兼傾拍攝內容，「我哋去到呢間老人院門口， Kaman就打電話畀呢位李先生話俾佢知我哋到咗， 然後對方話：『唔係約咗聽日咩？我啱啱出咗去，半個鐘後先返。』咁唔緊要啦，半個鐘啫，冇所謂嘅，收咗線之後， 我哋就入去老人院嗰度諗住坐低等佢返嚟。 好啦，高潮嚟啦…….. 入到去，我哋同接待處個職員講話我哋約咗李生開會， 然後個職員就黑人問號： 『李生？邊個李生？我哋呢度冇呢個人。』」
阿Bob話當時有一位林主任稱有一位所謂嘅「李先生」已用過唔同嘅名字、身份、卡片同資料， 利用佢哋老人院嘅名義去訂唔同嘅物件同貨品， 甚至搵啲裝修公司話老人院要維修報價、又試過約咗一個按摩師上到去話幫啲老人家按摩等， 「林主任話呢張卡片嘅內容有啲係真、有啲係假， 同埋其實之前佢哋已經報咗警、備咗案， 喺呢個時候，Kaman不斷打電話俾呢個李先生， 對方已經冇再聽電話，冇任何回覆。 呢一刻，我哋幾個人，進入咗懷疑人生嘅狀態」。
阿Bob笑言千年道行一朝喪，「出嚟撈咗20年， 第一次遇上呢啲點估都估唔到嘅劇情」，阿Bob奉勸幕前同行收到唔同渠道嘅工作查詢時，記得查核對方身份，以免搞到件事好怪同好尷尬，而阿Bob無奈稱唔知自己嘅遭遇算係騙案定係惡作劇， 「總之就係要執生啦，唉，黐鬼線！ 呢單嘢，真係好癲」。
查實《東張》早前曾報道有騙徒假扮學校職員要求「代訂床褥」行騙，從事銷售工作嘅李小姐被一名自稱中學訓導主任林老師欺騙，以向學校提供罐頭等食品為誘取得聯絡，其後哭訴校長與一供應商反面，急須向老人院提供輪椅出現供應問題，需要李小姐代表去問個報價，令李小姐被騙2萬幾元。
有網民見又係同老人院有關，估計阿Bob遇上同一個騙徒，而另一位網民指佢公司今年7月都收到類似電話，有人疑扮學校主任打嚟話要訂10萬蚊貨，老闆同佢傾咗幾次，後來發現有啲奇怪，同事打去嗰個學校先發現根本冇呢個人，又有一位網民話自己公司收到姓林嘅中學主任嘅電話，話「約見面要幫佢買30桶油漆華裝修用」。睇嚟呢個用唔同身份作詐欺嘅人，佢嘅騙案手法同出一轍。