夏韶聲（Danny Summer）一連兩晚嘅紅館演唱會呢晚舉行，張家輝、關詠荷、陶大宇、尹光、古天樂、張錦程、陳小春、森美、鄭子誠及陳敏之等到場睇騷，而廖碧兒亦前嚟支持舅父Danny Summer。
一向係UFO迷嘅Danny Summer，將呢次演唱會舞台變成太空基地，相隔25年再次踏上紅館，Danny Summer以最好嘅歌聲唱出多首經典歌，答謝樂迷多年嚟嘅支持。
Danny Summer之前講過佢好少獻唱代表作《空凳》，皆因佢每次唱呢首歌都會諗起亡父，呢晚Danny再次唱起呢首歌，見佢情緒激動，台下亦聽得如癡如醉。
