馬賽於2014年受艷照風波影響，演藝事業受影響，身心健康亮起紅燈，馬賽早前接受資深傳媒人汪曼玲網上節目訪問，剖白當年人生低谷經歷，自爆當年被古天樂當眾鬧足半粒鐘。馬賽近年由北京移居大灣區，早前跟《名媛望族》演員聚舊。佢話已準備好面對媒體，希望大眾能關注佢嘅新事業。
馬賽重提當年陷入人生低谷，自言受力捧嗰五年拍咗十幾套劇，每日工作十幾個鐘，馬賽話「我真係溫室中嘅小花……好似困住喺溫室，身邊都係好多保護你嘅人」，後嚟爆出緋聞及艷照風波，馬賽指喺佢嘅立場睇出街新聞「全部唔係我睇到嘅嘢」。
馬賽當年27歲面對負面新聞，顯得無助徬徨，指自己「超級崩潰」，演藝事業陷入停擺，身心受到嚴重打擊，更一度嚴重失眠，最終被診斷出患上抑鬱症，又唔想過度依賴藥物控制，於是佢跟常霖法師學禪修，盼望走出陰霾。
馬賽自爆當年為維護尊嚴，面對五個被告，打官司花費逾100萬，最後官司打到雙方做調解。馬賽記得律師同佢講，若果官司再打落去要用多150萬，馬賽坦言當時耗盡積蓄，將入行時爸爸幫佢畀首期嗰層樓賣出嚟籌律師費，佢決定離開香港。
馬賽徘徊喺黑暗低谷時期，佢決定離港，喺英國遊學時，曾與古天樂一齊食飯，被古生當住十幾人面前嚴厲地鬧咗至少半個鐘，「佢鬧我點解要離開香港？點解要喊？點解要咁軟弱」。馬賽承認當年唔明白古生嘅苦心，只覺得自己受到極大打擊，後嚟用咗好多年先明白古生係想鬧醒佢，「只不過嗰陣仲未醒，只係想避」，馬賽亦好感激古生。
