日前同 胡鴻鈞 合體開騷嘅 吳業坤 早前推出今年第二首主打派台歌《感激的直拳》。坤哥挑戰以搖滾旋律詮釋運動員由苦練到上場時嘅心路發展過程，務求將運動員嘅熱血透過音樂同大眾分享。
新歌由Supper Moment嘅Sunny作曲、梁柏堅填詞、賴映彤編曲同監製。坤哥指歌曲以自己喜愛嘅動畫《全職獵人》作靈感，亦致敬角色尼特羅會長嘅「每日一萬次滿懷感激的正拳」。佢認為將自己招式練到極致嘅精神，同運動員日夜不停訓練應付比賽嘅精神不謀而合。所以希望透過歌曲，將平時練習嘅心境同樂迷分享。
近年潛心練習空手道，更不時出賽嘅坤哥，早就曾透露新歌將會自肥，所以歌曲MV除親身以空手道運動員身份上陣外，仲邀請一眾運動員客串演出，將各類運動員訓練日常帶到幕前，令大眾可以對運動員更加深認識。
坤哥仲話：「本身呢首係情歌，但喺烏茲別克比賽時，突然覺得今次可能係人生中唯一一次機會，所以想用音樂記錄落嚟。」坤哥仲話呢首歌嘅出現係用自己嘅「熱愛」記錄另一份「熱愛」。 近數月多次以運動員身份見報嘅坤哥，亦希望透過歌曲告訴樂迷，佢並未放棄音樂同歌手之路，亦同樣熱愛運動員同演員嘅多重身份，所以希望成為「半職」獵人，各方面都為大家盡力呈現最好一面。
