曾喺多地發展音樂事業嘅 張與辰 兜兜轉轉以《中年好聲音3》喺香港出道，擁有自己第一首廣東單曲《深海》，呢日佢作客《StarTalk》接受 許文軒 嘅專訪，分享成長經歷同愛情觀。
與辰因為爸爸有賭癮，所以自幼喺單親家庭長大，曾經佢都因為單親而喺學校被欺凌，自己亦羨慕過雙親健存嘅幸福家庭。與辰媽媽係職業歌手，亦曾經有人用唔好聽嘅字眼形容張媽媽，但與辰並唔認為係媽媽嘅工作令佢被嘲笑，反而認為媽媽工作好好。
與辰長大後曾與爸爸見面，當時爸爸入咗院，與辰探望對方，喺探病期間將心中多年嘅心事同不滿一一盡訴，佢講到喊，爸爸聽到喊。而經過呢件事後，與辰覺得自己輕鬆唔少，可以翻篇向前行，但佢覺得關係始終難以修補得好。
與辰嘅歌唱事業亦遇過谷底時期，04至07期間曾被公司雪藏，窮到要去電話亭搵人哋漏低嘅散銀買飯食，更冇錢交租，要去朋友鋪頭打地鋪，嗰次更係佢第一次向媽媽申手要錢。
而第二次向家人求救，就係2015年墮入最大谷底，敗於自己一心想成為歌手而唔係做音樂人，所以跌入陷阱之中，簽約後發現自己被詐騙，所以搞到嚴重抑鬱。
講到同戴佩妮嘅友誼，與辰就指對方2015年透過媒體報道，知道佢喺台灣過得好辛苦，所以就搵方法聯絡自己，叫佢將創作嘅歌曲俾自己聽，再慢慢教佢改。
《深海》係與辰第一首廣東歌，亦係佢親自作曲，圍繞與辰嘅愛情觀。與辰指自己同愛情隔得好遠，曾經愛上一個人但嚟唔切表白，對方就因為車禍離世，呢個打撃非常巨大。
之後與辰成為歌手，再遇到一個對象，但對方原來極有企圖心，想喺自己身上搵好處，後來發現佢只係窮歌手就決定分手。與辰指自己唔渴望愛情，因為怕被拒絕，亦會隱藏好多嘢，更唔會令對方知道自己心意。
