周吉佩 自從奪得《中年好聲音》冠軍之後，工作喺過去兩年間可謂忙到無時停，不過身為愛妻號兼一對仔女之父嘅吉吉，就一直堅持平衡工作同家庭。踏入暑假，吉吉幾忙都要抽時間同仔女去旅行。
日前佢就相約魏嘉信一家北上旅行，吉吉趁今次旅行，就帶仔女到北京感受吓歷史文化喇。
吉吉喺社交平台分享一家四口旅行相，相中吉吉化身皇帝、太太就變皇后，而一對仔女就係太子同公主。佢仲話：「每逢去一個地方，我哋都會入鄉隨俗影一輯相，上次去韓國影過韓國宮廷相，今次北京之旅都唔例外，影輯皇帝相。」吉吉仲話當地天氣高達35度，不過都想帶仔女好好欣賞吓故宮，而整個體驗都好值得。
