陳嘉佳（細細粒）近年喺內地發展得如魚得水，直播帶貨吸金力極強，仲好識經營自己社交平台。一向係「肥妹仔」嘅細細粒，喺2023年因健康原因決心減肥，由最高峰286磅減至約150磅，擁有一副好身材後佢更不時喺網上分享靚相，展示自己努力成果。
之但係，最近有眼利網民發現細細粒好似有身形反彈危機。喺細細粒最近分享嘅一條由杭州自駕到福州嘅美食Vlog中可見，佢為咗嘆美食而揸7個幾鐘車直奔當地，一落車就開始品嚐油餅、手工肉包、鍋邊糊等特色食物。
但從片中可見，細細粒由「面尖尖」又似乎變返大家熟悉嘅「圓臉」亦見到雙下巴浮現，身形比瘦身初時亦厚實唔少，逐漸同大家熟悉嘅肥嘟嘟細細粒越嚟越似。
不過細細粒自瘦身後一直被講「瘦得好怪」、「瘦得唔靚」，網民見到佢反彈後，雖然有批評嘅聲音，但亦有人話：「寶寶都係肥嘟嘟好看一點，比較有觀眾緣一點！」其實只要身體健康，無論肥定瘦都完全唔重要。