Robynn Yip（葉中月）首張個人大碟《Phases of the Moon》，下月將推出1000張限量版黑膠碟，又落實9月14日舉行新碟發佈迷你演唱會，同樂迷近距離共聚。
Robynn親自為專輯主題曲《一顆月亮的故事》作曲，仲同舊戰友曰云一齊填詞、Randy Chow 擔任監製，Ariel Lai 負責編曲。佢仲話非常感恩一班識於微時嘅拍檔，二話不說就答應為佢歸隊呀。
呢首歌亦係Robynn音樂路上嘅剖白，佢認為好似月亮即使月缺月圓，有明有暗，依然循環不息轉動，不論變化如何，其實月亮一直常在。
Robynn指新歌可以話係組合時代品《一顆星的故事》嘅延續篇。自2012年出道到5年前單飛成為獨立歌手，13年來歌迷都會默默支持。Robynn自言曾掙扎過係咪應該繼續唱歌，但因為歌迷嘅力量，所以勇敢走到今日。
今次新歌連MV製作團隊都包含4位忠實粉絲嘅努力，Robynn聘請佢哋合力構思內容同拍攝、製作、一齊剪片。MV同專輯都用上紙飛機作主題，構思來自寫歌嘅紙張，摺成紙飛機透過音符、音樂同歌迷們穿越月相變化。當中嘅巨型紙飛機更係由30多位跟隨多年嘅粉絲，親筆寫上歌詞，字跡令彼此留下永恆記憶，如同音樂旋律永遠聲生不息流傳。
