姚焯菲 舊年12月喺新西蘭高中畢業返港後，一直全身投入演藝事業，而佢嘅升學動態終於有最新消息。經過半年多嘅深思熟慮，Chantel日前喺歌迷會聚會向一眾「小菲象」分享，即將到美國入讀明星大學紐約大學，攻讀為期四年嘅Music Business課程，成為多位國際巨星如Lady Ga Ga、Taylor Swift等嘅師妹。
離別在即，一班《愛．回家之開心速遞》嘅拍檔都唔捨得呢位妹妹，Chantel喺《愛．回家》大家庭亦難掩不捨之情。自從Chantel加入就一直深受劇組同觀眾喜愛。
眾人當中最「開心」嘅就係飾演Chantel表哥嘅 周嘉洛 ，佢話：「我終於可以攞返滕麗名，加上佢又可以去到心儀嘅學校讀書。」而阿滕就指讀書最好，讀到書就乜都冇問題。呂慧儀則大讚Chantel叻女，識得考慮自己升學前路，又趁考慮嘅時間去搵錢，大家仲異口同聲覺得冇嘢難到Chantel，亦非常期待佢再回歸，放假返港客串演出。
另外，廿四孝媽咪長腳蟹為囝囝炮製愛心餐盒，希望改善囝囝偏食問題，身旁嘅嘉洛即刻向媽咪阿滕撒嬌，叫媽咪平日唔好提早返工，準時就得，如果提早嘅時間就整愛心飯盒畀自己，令阿滕哭笑不得。
