《2025香港小姐競選》14位佳麗日前同 袁偉豪 劉佩玥 到檳城拍攝外景，講到當地嘅打卡熱點，當地唔少得著名景點「姓氏橋」，一眾佳麗齊齊著上白裙配以草帽，喺「姓陳橋」同「姓周橋」上漫步留影。不過，要喺呢條咁窄嘅木橋上擺靚靚甫士都的確有難度，阿Moon直認喺橋上拍攝時係強顏歡笑，因為條橋狹窄加上現場大風，令佢好驚會跌落水。
9號陳詠詩 話喺海風同靚景下拍攝感覺好享受， 2號甘詠寧 就指起初踏上木橋都覺得少少驚，習慣咗之後就覺得開心。同樣感覺開心嘅仲有 3號蔡華英 ，因為佢好享受陽光同海洋。 6號朱文慧 憶述喺橋上拍攝轉身動作時，突然有風吹過，當時好擔心會跌落海。 7號施宇琪 被問到會否擔心被吹落海，佢就搞笑話：「咁重點吹我落海。」
檳城盛產榴槤，四周都不時飄來榴槤之香，見到眼前肥大肉厚嘅榴槤果肉，阿Moon同一班榴槤控佳麗都食唔停口，阿Moon更自言非常幸福，好似身處天堂一樣。佢仲專家上身介紹唔同品種。5號曾閱遙好開心品嚐到香港冇嘅榴槤品種，4號莫凡就對當中一個品種印象特別深刻，因為食落有蝦嘅味道，而 13號袁文靜 都分享最愛品種。
影飽食醉，佳麗們又浩浩浩蕩蕩去咗歷史博物館參觀，入到去好似坐咗時光機咁穿越昔日嘅檳城，佳麗們都興奮咁嚟個沉浸式嘅體驗，拍攝行程中，2號甘詠寧竟然遇到英國嘅朋友，令佢非常驚喜。
