「邵氏雙俠」狄龍與姜大衞當年係影壇黃金搭檔，曾合作多部經典電影《十三太保》、《新獨臂刀》、《報仇》等，以前佢哋曾係好兄弟，後嚟卻傳出二人不和，姜大衞早年接受傳媒訪問，曾指二人「道不同」，更直言與狄龍再合作嘅機會不大，狄龍近期榮獲《第8屆馬來西亞國際電影節》終身成就獎，受訪時罕有提及盛傳不和多年嘅姜大衞，狄龍卻指姜大衞係「永恆的朋友」。
曾有傳狄龍與姜大衞關係決裂長達50年，有指因1975年拍《傾國傾城》時疑因戲份問題，使二人埋下心結，更傳喺片場大打出手；另一說法就係有傳當年恩師張徹離世，狄龍選擇喺北京拍戲，僅派兒子譚俊彥代為出席恩師葬禮，令姜大衛十分憤怒。
狄龍最近罕有回應跟姜大衞嘅恩怨情仇，佢心平氣和表示與對方係永恆嘅朋友，佢喺言談間透露好珍惜呢位老朋友，狄龍指喺邵氏嗰陣仲係好年輕，當時參加訓練班，跟姜大衞一齊出道，「姜大衞嗰陣跟張徹導演，係佢一手培養，當時笑我哋兩個係『孟不離焦、焦不離孟』，後來各奔東西」，狄龍覺得唔影響二人關係，「因為真正嘅朋友不在時間上，而係永恆嘅。」
狄龍與秦沛喺《萬千星輝頒獎典禮2021》獲頒「萬千光輝演藝大獎」予姜大衞，後嚟姜大衞接受傳媒訪問表示事前毫不知情，被問到當年不和傳聞，姜大衞仲話二人「道不同」，澄清二人冇打交或嗌交，亦冇數落對方，只係長大後諗法唔一樣，彼此各行各路。當問到係咪因狄龍缺席張徹葬禮而令友誼決裂，姜大衞話呢個係狄龍決定，自己唔會嬲亦「冇得講」，直言「有啲場合見到面咪Hello囉」，不過二人再合作嘅機會不大。 未知今次狄龍釋出善意，會否令呢對黃金搭檔，化干戈為玉帛呢！？
