選秀節目《聲秀》而家進行得如火如荼，七位導師譚耀文、蘇永康、劉浩龍、吳浩康、泳兒、鍾舒漫同胡鴻鈞（Hubert），嚟緊將會帶領旗下三名學員喺「導師策略戰」對決，七位導師過往係參加歌唱比賽而入行，好似阿譚當年就係參加第七屆新秀歌唱比賽勇奪冠軍，阿譚當年已目標清晰，仲話「如果我可以唱歌，我一定會終身作為歌手」。
而當年勇奪《全球華人新秀歌唱大賽》香港區選拔賽亞軍嘅吳浩康，當年只係16歲嘅中學生，佢就話自己擅長彈結他同作曲，年紀輕輕已經好有潛質呀。
至於泳兒就係2005參加《英皇新秀歌唱大賽》香港區選拔賽奪得亞軍，泳兒話當年參賽係因為啱啱畢業，又唔想咁快工作，於是就報名參賽，所以過程中未感壓力。而同屆嘅鍾舒漫就奪得冠軍，Sherman話細個好細膽，即使自己鍾意唱歌，但唔敢表露出嚟，但去到中學時就慢慢放膽享受唱歌。
蘇永康係年資最深嗰位啦，當年佢參加《第四屆新秀歌唱大賽》，當年只得17歲嘅蘇永康，喺決賽者當中年紀最細嘅一位，憑一把靚聲勇奪亞軍。而師兄劉浩龍參加1997年《第16屆全球華人新秀歌唱大賽》香港區選拔賽冠軍，入行後師兄做過主持，亦做過賣錶工作，最後如願做到歌手。
七位導師中，Hubert嘅年資就係最淺嘅一位，2010年佢參加《超級巨聲2》獲得亞軍，同年參加《TVB全球華人新秀歌唱大賽2010》奪得冠軍寶座，Hubert話當年參加巨聲，完全係最老土嘅橋段，就係朋友幫佢報名而自己係毫不知情，就係咁樣無心插柳柳成蔭。